پول پٹیاں کھولنے والا فوجی شرابی اورعادی مجرم ہے، بی ایس ایف
drunken bsf criminal

فیس بک پربھارتی فوجی اہلکاروں کی بدحالی کی پول پٹی کھولنے والے اہلکارکا لائن آف کنٹرول سے پونچھ ہیڈکوآرٹرتبادلہ کردیا گیا ہے۔

فوجی کے الزامات پر ردعمل ظاہر کرتے ہوئے سرحدی نگرانی کرنے والی فورس بی ایس ایف نے کہا ہے کہ تیج بہادر شرابی اور عادی مجرم ہے۔ سرحدی نگرانی کرنے والی فورس بی ایس ایف نے کہا ہے کہ تیج بہادر شرابی اور عادی مجرم ہے، وہ کئی باربغیر اجازت ڈیوٹی سے غیر حاضر رہا ۔وہ سینئیرافسرا ن کی عزت بھی نہیں کرتا تاہم اس کے الزامات کی تحقیقات کیلیے سینیئر افسر موقع پر بھیج دیا ہے۔ تیج بہادر نے سخت دباؤ کے باوجود بھارتی فوج کا بھانڈا پھوڑنے والی وڈیو ہٹانے سے صاف انکار کر دیا ہے ۔ اس نے اگرچہ اپنے آپ کو نقصان پہنچائے جانے کا اندیشہ ظاہر کیا ہے لیکن اس کا کہنا ہے کہ اگر میرا نقصان ہو کر دوسرے سپاہیوں کا بھلا ہو سکتا ہے تو مجھے منظورہے۔ اس کا موقف ہے کہ جوکہا سچ کہا،تحقیقات کرلی جائیجو سچ ہے وہ سب کے سامنے آجائے گا۔یہ وڈیو منظر عام پر آنے کے بعد بھارتی وزیر داخلہ راج ناتھ سنگھ کی طرف سے ٹویٹر پر جاری ایک بیان میں کہا گیا ہے کہ مذکورہ وڈیو انھوں نے دیکھی ہے اور بارڈرسکیورٹی فورس ( بی ایس ایف) سے جوانوں کو غیرمعیاری کھانا دینے پر تفصیلی رپورٹ طلب کرلی ہے اور ذمے داروں کے خلاف کارروائی کی ہدایت کی ہے ۔  اپنی وڈیو میں بھارت کی بارڈرسیکیورٹی فورس کی 29 ویں بٹالین کے اہلکار تیج بہادر یادو نے جلی ہوئی روٹی دکھاتے ہوئے بتایا تھا کہ ان کا راشن افسران بیچ کر پیسے کھرے کر لیتے ہیں جبکہ انہیں ناشتے میں ایک پراٹھا اور چائے کی پیالی دی جاتی ہے ،دن کو ہلدی اور نمک والی دال اور روٹی دی جاتی ہے جبکہ رات کا کھانا بعض اوقات ملتا ہی نہیں اور انہیں بھوکا سونا پڑتا ہے، ایسی حالت میں وہ کیا خاک لڑیں گے۔ تیج بہادریادونے کہا کہ وہ اپنی اس حالت زار کے لیئے حکومت کو نہیں بلکہ اپنے افسران کو ذمہ دارسمجھتا ہے اوربتایا کہ فوجی اہلکاروں کے خلاف اس ناانصافی اور جان بوجھ کر روا رکھے گئے ظلم کے خلاف کوئی آواز نہیں اٹھاتا۔ ٹی وی رپورٹ کے مطابق ناقص خوراک کی شکایت کرنے والے بھارتی فوجی تیج بہادر کو لائن آف کنٹرول سے ہٹا کر پلمبر بنا دیا گیا ہے۔ دوسری جانب تیج بہادر کی اہلیہ شرمیلا نے شوہر کو بطور سزا پلمبر بنانے کے خلاف احتجاج کرتے ہوئے کہا ہے کہ روٹی کی مانگ غلط تو نہیں ہے۔

تازہ ترین

اپنا تبصرہ چھوڑیں